پادیشاهین بیر کنیزه عاشیق اولماسی، کنیزین پوللا آلینماسی، سونرا کنیزین خستهلنمهسی، خستهلییین اوزون چکمهسی
پادیشاهین بیر کنیزه عاشیق اولماسی، کنیزین پوللا آلینماسی، سونرا کنیزین خستهلنمهسی، خستهلییین اوزون چکمهسی یازار: مولوی |
پادیشاهین بیر کنیزه عاشیق اولماسی، کنیزین پوللا آلینماسی، سونرا کنیزین خستهلنمهسی، خستهلییین اوزون چکمهسی
ائشیدین ائی دوستلاریم، ایندی مندن بیر داستان،
اؤزو ده بیر حقیقی داستاندیر حالیمیزدان.
اؤز نقدی حالیمیزدیر، آختارساق کؤکون اگر،
ایندیکی دونیامیزدان، عوقبادان وئریر خبر.
چوخ قدیم زامانلاردا، بیر پادیشاه وار ایدی،
هم دونیادا عادیل شاه، دین اوچون شاهوار ایدی.
بیر گون همین گؤزل شاه، اولدو آتینا سووار،
سئویردی اووچولوغو، هر واخت ائدیردی شیکار.
اوو ائتمک مقصدیله، داغدا – داشدا قالدی او،
بیر گون «اوو تلهسینه»، ایلیشدی، اوو اولدو او،
-شاه بیر کنیزی گؤردو، اوو یولونون یانیندا،
وورولدو او، کنیزه، عشق اویاندی جانیندا،
قفسدهکی، قوش کیمی دؤیونوردو اورهیی،
پوللا آلدی کنیزی، چین اولدو اؤز ایستهیی.
سونرا خبردار اولدو، کنیزین احوالیندان،
ائشیتدی خستهدیر او، ناراحاتدیر جانیندان.
«اولاغ واردی بیرینده، تاپیلمیردی پالانی،
پالان تاپدی اولاغچین، قورد آپاردی اولانی.
بیرینده کوزه واردی، سویون تاپا بیلمیردی،
سو تاپیلدی کوزهیچین، کوزهسینی ایتیردی».
دونیانین هر یئریندن، شاه طبیبلر چاغیردی،
دئدی:- ایکیمیزینده، وضعییتی آغیردی.
اؤز جانیمی ایستهمهم، جانیمین جانی اودور،
دردیمندم (دردمندم)، خستهیهم، دردین درمانی اودور.
هر کیم درمان ائدرسه، منیم بو جانانیمی،
قیزیل خزینم اونون، آلسین خانیمانیمی.
هامی او شاها دئدی: -جانلار قورباندیر سنه،
بیزه ایجازه وئرسن، شریک اوللوق دردینه.
طبیبدیر هر بیریمیز، جاهاندا مشهوروق بیز،
آغیر دردلری تاپان، علاج ائدن نوروق بیز.
تانریمیز اگر اونو، شاد ائتمک ایستهیرسه،
وئرر شفالار اونا، شادلیق وئرر سس- سسه.
« اینشاللاه» سؤیلنمسه، موراد هئچ واخت آلینماز،
ساغالما دا باش وئرمز، موعالیجه اولونماز.
چوخلاری « اینشااللاه» سؤیلهمیش، یاد ائیلهمیش،
تئز جانینی تاپشیرمیش، روحون آزاد ائیلهمیش.
نه قدر ایچدی درمان اونا ائتدیلر دوا،
چوخالدی اذییتلر، باش وئردی چوخلو جفا.
خستهلیک اوجباتیندان، کنیز توک کیمی اولدو،
شاه گؤز یاشی آخیتدی، رنگی سارالدی، سولدو.
قضادان او کنیزین، بنیزی چوخ سارالدی،
بادام یاغی سورتولدو، رنگی - روحو قارالدی.
هلیلهدن قبض اولدو، حرارتی ده آرتدی،
سو ایچمک یاتیرمادی، سوسوزلوق عرشه چاتدی.
بدنی تام سوست اولدو، یوخو عرشه چکیلدی،
اورگینه درد قوندو، گؤز یاشلاری تؤکولدو.
ادویهلر شربتلر، وئریلدی او کنیزه،
طبیبلرده یورولدو، دردی باخمادی سؤزه.