სონჷ ხანი რე...
სონჷ ხანი რე ვამძირჷ მუმაშჷ საფულე,
ჩქიმჷ ოხორსუ შორშე მივოყიყინა,
მეხით კასილჷ გური სოიშახჷ მაფულე,
ართშა ნტერსუ მეტირხჷ ძვალი ხიხილა!
სონჷ ხანირე დუდშა მემიძჷ ჯიკი დო
მუნმოქუნსუ ჩელა ნირსი ჩხოროფა,
სუმჷ წანარე ვაგომწყუმუ ლიკვი დო
შქვიდელი რე ხეშქაგურსუ ჸოროფა.
სონჷ ხანი რე ორჟონეფიშჷ ხარკალი,
ჩქინჷ ოსურიშჷ ურემიას მებირძღუ,
სონჷ ხანი რე გილებგაგჷქ მარგალი,
ბუმბულჷ-ნორჩალქ დიკაკლარჷ დო დექირცხუ.
სონჷ ხანი რე ქივაგური ლაგვასუ,
მიზღვინდუანს ჟინბორია ჯაქალა,
სონჷ ხანი რე ვასქუაფუ ლაგვანსუ,
ბინეხეფი ჸურუმულო ნაფალა.
სონჷ ხანი რე ჩქინი ცირა ჸვირალი,
ნაბურშელა სქუალეფცუ ორჩქინანს,
ჟანგიქ ოჭკუმჷ ლეკურჷ ეიოპირალი
დო მიანგარს ექი-აქო გორჩქინას.
რინჷ ვაჯოხო კონჭიშჷ გეთოლუაფას,
კოჩჷ ვაჯოხო კოს ხორხოტა ნკალირსუ,
დუცულაფი დუდიშჷ ეთოლუაფას
დო გილულას კუდელჷ ეთომპალირსუ!